Baie mense en groepe maak vandag aanspraak daarop dat hulle draers en verkondigers van die evangelie is. Talle programme word aangebied en baie geld word spandeer om hierdie "evangelie" te promoveer. Deur hierdie "evangelie" met die "ewige evangelie" van Openbaring 14 te vergelyk, blyk dit egter dat daar êrens ‘n groot skroef los is. Hoe verskriklik dit ook al mag klink om dit te moet sê, kan ‘n mens nie anders nie as om te erken: Die populêre evangelie wat in meeste kerke en by groot saamtrekke en op talle "sendingvelde" verkondig word, IS NIE DIESELFDE as die "ewige evangelie" wat die boodskapper van Openbaring 14 aan die mense van die aarde verkondig het nie.

Die woord "evangelie" is ‘n direkte vertaling van die Griekse woord "euangellion" wat sowat 75 keer in die Na-Messiaanse Geskrifte gebruik word. Letterlik vertaal, beteken hierdie woord: "goeie boodskap" of "goeie nuus". Die woord "euangellion" is heel waarskynlik ‘n Griekse vertaling van die Hebreeuse woord "basar" wat onder meer voorkom in YeshaYahu 52:7 ("Hoe lieflik is op die berge die voete van hom wat die goeie boodskap bring, wat vrede laat hoor, wat goeie tyding bring, wat verlossing uitroep; wat aan Tsion sê: Jou Elohiem is Koning!") en YeshaYahu 61:1 ("Die Gees van die Meester Yahweh is op My, omdat Yahweh My gesalf het om ‘n blye boodskap te bring aan die ootmoediges; Hy het My gestuur om te verbind die gebrokenes van hart, om vir die gevangenes ‘n vrylating uit te roep en vir die geboeides opening van die gevangenis"). Die werkwoord "basar" beteken letterlik "om vars, lewendig te wees; om vlees (vel) te hê of vlees te kry; om bly te wees of bly te maak; om ‘n blye boodskap te bring". Dis tragies dat heelwat van hierdie betekenis eintlik in die populêre gebruik van die woord "evangelie" verlore gaan.

Een van die probleme is dat baie Engelse vertalings volhard om "euangellion" met die woord "gospel" te vertaal. "Gospel" is afgelei van die Anglo-saksiese woord "god-spell" wat om twee redes onaanvaarbaar is: (1) "God" is ‘n mensgemaakte woord as aanspreekvorm vir die Almagtige wat ‘n konkoksie is van verskillende vorme van die naam van ‘n afgod, onder meer "Gad", "Godan", "Goda" en "Gud", en (2) Die woord "spell’ beteken onder meer "A charm consisting of some words of occult power", maar ook "a short time; a little time". Nie een van hierdie beskrywings laat reg geskied aan die wese van die "goeie boodskap" wat reg deur die Skrif verkondig word nie.

Kom ons kyk na ‘n aantal eienskappe van die "ewige evangelie" wat in Openbaring 14 ter sprake kom, sodat ons kan deurdring tot die kern van die misleiding van ons dag, maar ook die hart van die goeie boodskap wat Yahweh wil hê ons moet hoor.

1. Die ewige evangelie is bedoel vir alle nasies en stamme en tale en volke. As iemand ‘n "evangelie" bring wat "eksklusief" is in die sin dat dit sekere groepe insluit en ander groepe nie, is dit ‘n valse evangelie.
2. Die ewige evangelie gaan in sy wese daaroor om die enigste ware Elohiem te vrees. Sonder om in te veel detail in te gaan, is dit belangrik om te verstaan dat as die Skrif in hierdie sin van "vrees" praat, beteken dit onder meer om Yahweh te gehoorsaam, deur sy gebooie te hou (bv. Devariem 10:12-13 "En nou, Yiesraél, wat eis Yahweh jou Elohiem van jou as net om Yahweh jou Elohiem te vrees, in al sy weë te wandel en Hom lief te hê en Yahweh jou Elohiem te dien met jou hele hart en met jou hele siel, om te hou die gebooie van Yahweh en sy insettinge wat ek jou vandag beveel, dat dit met jou goed kan gaan?"). Enige "evangelie" wat te kenne gee dat dit nie nodig is Yahweh se gebooie te hou nie, is ‘n valse evangelie.
3. In die ewige evangelie word daar aan Yahweh alleen eer gegee. Dit bestaan onder meer daarin dat die Almagtige geëer word deur sy Naam, Yahweh, met eerbied te gebruik. Dit sluit aan by die derde gebod ("Jy mag die Naam van Yahweh, jou Elohiem nie inhoudloos maak nie") en ook by YeshaYahu 42:8 ("Ek is Yahweh, dit is my Naam; en my eer sal Ek aan geen ander gee nie"). Dit beteken ook dat Yahweh as Vader erken word en Y'shua as die Seun, wat Homself volledig aan die gesag van sy Vader onderwerp het. Die "evangelies" wat vandag oraloor verkondig word, behoort ook aan hierdie kriterium gemeet te word.
4. Die ewige evangelie probeer nie die oordeel van Yahweh omseil nie. Mense word deesdae te maklik gepaai met die boodskap dat hulle die oordeel sal vryspring as hulle net sekere formules gebruik en sekere doktrines aanhang. Dit bring opnuut die "spell" aspek van die woord "gospel" na vore, wat soms net soos ‘n "charm" hanteer word. Die ewige evangelie het nie towerformules nie. Dit vra toewyding en gehoorsaamheid en draai nie doekies om daaroor dat hulle wat nie ‘n pad van gehoorsaamheid bewandel nie, nie die koninkryk van Yahweh sal binnegaan nie (vgl. Matt 13:41; 1 Kor 6:9; Efes 5:5; Openbaring 21:27; 22:14).
5. Die ewige evangelie probeer nie torring aan die duidelike boodskap van die Skrif dat Yahweh die Skepper van die hemel en die aarde is nie. Dit beteken onder meer dat die ewige evangelie onversoenbaar is met allerlei (evolusie) teorieë wat probeer om die skepping na sekere natuurlike oorsake terug te voer. Lees gerus wat talle wetenskaplikes hieroor te sê het. Ons volstaan met ‘n paar aanhalings:

"The pathetic thing is that we have scientists who are trying to prove evolution, which no scientist can ever prove." (Dr Robert Millikan, Nobel Prize winner and evolutionist)

"We have to admit that there is nothing in the geological records that runs contrary to the views of conservative creationists." (Evolutionist Edmund Ambrose)

"Modern apes ... seem to have sprung out of nowhere. They have no yesterday, no fossil record. And the true origin of modern humans ... is, if we are to be honest with ourselves, an equally mysterious matter." (Lyall Watson, Ph.D., Evolutionist)

"My attempts to demonstrate evolution by an experiment carried on for more than 40 years have completely failed." (N.H.Nilson, famous botanist and evolutionist)

"Not one change of species into another is on record ... we cannot prove that a single species has been changed." (Charles Darwin, My Life & Letters)

"Fossils are a great embarrassment to Evolutionary theory and offer strong support for the concept of Creation." (Gary Parker, Ph.D., palaeontologist and former evolutionist)