HOE HANTEER ONS KWELLINGE?

Charles Spurgeon het êrens geskryf: "The very essence of anxious care is the imagining that we are wiser than the Almighty, and the thrusting ourselves into his place to do for him that which he has undertaken to do for us." Kwelling en kroniese bekommernis oor aardse dinge is een van die grootste vyande van geloof. Deur gedurig besorgd te wees oor sake wat met ons daaglikse lewe te make het, beroof ons onsself van die geloofskalmte en die "shalom" wat Yahweh deur sy Gees in ons harte uitgestort het. Wat meer is, ons straal die boodskap uit dat ons nie seker is of ons hemelse Vader in staat is om ons probleem vir ons op te los nie – al het ons hoe ernstig daaroor gebid. Daar is niks wat meer skadelik op ons geloof inwerk as dit nie. Daar is ook niks wat ons getuienis teenoor ander mense minder geloofwaardig maak as dit nie. Kom ons vind uit wat die Skrif vir ons in hierdie verband kom leer.

  1. Tehielliem 55:22 Werp jou sorg op Yahweh, en Hy sal jou onderhou; Hy sal nooit die regverdige laat wankel nie (vgl. ook 1 Kefa 5:7). Hierdie vers is nie net die basiese geloofsoortuiging van hulle wat Yahweh aanbid nie, dit is ook die diepste rede waarom dit ‘n groot fout is om ons sorge self te probeer dra. Wanneer ‘n mens jou sorge eiehandig probeer hanteer, is die kanse goed dat jy verkeerde metodes gaan gebruik en nog dieper in die dryfsand van vertwyfeling gaan wegsink. Die Woord sê ondubbelsinnig: Yahweh SAL diegene onderhou (bewaar en bewaak – "natsar") wat hulle vertroue in Hom stel – net soos Hy vir Avraham en Josef en Dawied en EliYah bewaar het. Dit word treffend verwoord in Devariem 32:9-12: "Want Yahweh se deel is sy volk, Yaákov is sy afgemete erfdeel. Hy het hom gevind in 'n woestynland en in 'n woeste wêreld, vol gehuil van die wildernis; Hy het hom omring, op hom ag gegee, hom bewaak ("natsar") soos sy oogappel. Soos 'n arend sy nes opwek, oor sy kleintjies sweef, sy vlerke uitsprei, hulle opneem, hulle dra op sy vleuels - Yahweh alleen het hom gelei, en daar was geen vreemde El by hom nie."
  2. YermeYahu 17:7-8 Geseënd is die man wat op Yahweh vertrou, en wie se vertroue Yahweh is. Want hy sal wees soos 'n boom wat by die water geplant is en sy wortels uitskiet by die stroom en nie vrees as daar hitte kom nie, maar sy blad bly groen; en in 'n jaar van droogte is hy nie besorg nie en hou nie op om vrugte te dra nie (vgl. ook Tehielliem 1:1-3). Om oormatig besorg oor allerlei aardse dinge te wees is ‘n aanduiding dat ons Yahweh nie meer vertrou soos wat ons Hom behoort te vertrou nie. Dat ons wortels nie meer by die stroom van lewende water is nie en dat ons daarom nie meer kan oorleef en kan vrug dra as daar "hitte" en "droogte" kom nie. Die manier waarop die woorde in vers 7 in Hebreeus op mekaar volg, plaas ‘n drie-dubbele klem daarop dat ons vertroue slegs in Yahweh moet wees:
    3.

     

  3. Tehielliem 127:1-2 As Yahweh die huis nie bou nie, tevergeefs werk die wat daaraan bou; as Yahweh die stad nie bewaar nie, tevergeefs waak die wagter. Tevergeefs dat julle vroeg opstaan, laat opbly, brood van smarte eet - net so goed gee Hy dit aan sy beminde in die slaap! (vgl. ook Tehielliem 39:6). Baie van die kommer en smart wat mense soms deurmaak, het daarmee te make dat hulle nie sover kan kom om Yahweh volledig met die bou van hulle huis (oftewel: die hantering van hulle krisisse) te vertrou nie. Hierdie soort bekommernis is nie net sleg vir ‘n mens se gemoedstoestand nie, dit is ook heeltemal tevergeefs – met ander woorde, dit is smart wat ‘n mens jouself aandoen wat hoegenaamd nie nodig was nie. Dit waaroor ons nagte wakkerlê en ure oor tob, en nog baie meer, kan ons hemelse Vader in ‘n oogwink, ja, selfs in ons slaap, vir ons gee!
  4. YermeYahu 2:13 Want my volk het twee verkeerde dinge gedoen: My, die fontein van lewende water, het hulle verlaat om vir hulle reënbakke uit te kap, gebarste reënbakke wat geen water hou nie (vgl. ook YeshaYahu 55:2) Die reënbakke wat baie van ons besig is om uit te kap (dikwels met groot moeite en verdriet) is nie net gebars nie (dus beantwoord dit nie aan sy doel nie), dit hou ons ook weg van Yahweh, die Bron van lewende water. Aardse kwellinge is dikwels die gevolg daarvan dat ons ons afsloof vir iets wat nie werklik kan versadig nie. Daarom behoort ons die woorde van YeshaYahu 55:2 ter harte te neem: "Luister aandagtig na My en eet die goeie, en laat julle siel hom in vettigheid verlustig."
  5. Tehielliem 37:5 Laat jou weg aan Yahweh oor en vertrou op Hom, en Hy sal dit uitvoer (vgl. ook Mieshleh 16:3). Dit is Yahweh se wysheid om sy weë aan ons toe te vertrou. Dit is ons wysheid om ons weë aan Hom toe te vertrou. Dit is die wysheid van die Allerhoogste om vir ons ‘n pak te gee om te dra wat soms met moeite en verdriet gepaard gaan. Vir ons is dit wysheid om daardie pak weer aan Hom oor te gee, sodat Hy dit vir ons kan dra. "He gives you your portion of suffering, accept it with a cheerful heart, and then take it back to him with assured confidence."
  6. YeshaYahu 50:10 Wie is daar onder julle wat Yahweh vrees, wat na die stem van sy Kneg luister, wat in duisternisse wandel en geen ligstraal sien nie? – laat hy vertrou op die Naam van Yahweh en steun op sy Elohiem! Dis opvallend dat die woorde "(hulle) wat in duisternisse wandel en geen ligstraal sien nie" omring word deur vier waarhede wat vir elke gelowiges soos ‘n paal bo water moet staan – veral in tye van bekommernis en besorgdheid: (1) Ek is deel van hulle wat Yahweh vrees; (2) Ek is deel van hulle wat na sy Kneg luister; (3) Ek is een van die wat op sy Naam vertrou en (4) Ek is een van die wat steun op hulle Elohiem. Op dieselfde manier moet ons troos put uit die rykdom van die Woord van Yahweh wanneer besorgdheid dreig om ons te oorweldig.