ONS TYE IS IN SY HAND
Vir ons as mense is tyd dikwels 'n probleem. Soms sukkel ons met periodes van tyd (wag periodes of periodes van swaarkry) wat vir ons gevoel te lank is. Soms is ons tyd (om 'n sekere taak af te handel) te min en wens ons ons het meer tyd gehad. Dan is daar ook die onbekendheid en die onsekerheid van tyd wat nog in die toekoms lê. En die skuldgevoelens wat ons dikwels beleef omdat ons die tyd wat verby is nie beter benut het of op 'n ander manier deurgebring het. Om nie te praat van hoe benoud dit 'n mens maak as jy van tyd tot tyd ontdek hoe ontstellend vinnig tyd verbygaan en hoe waar dit is wat daar in Psalm 90 staan: "Ons bring ons jare deur soos 'n gedagte
".Vir Yahweh is tyd natuurlik nie so 'n probleem soos vir ons nie. Vir Hom is een dag soos 'n duisend jaar en duisend jaar soos een dag (Tehielliem / Psalm 90:4; 2 Kefa / Petrus 3:8). Hy het tyd gemaak en staan in beheer van daardie faktore wat tyd bepaal en beïnvloed. Hyself bestaan van ewigheid tot ewigheid en staan in 'n sekere sin buitekant, en verhewe bokant, die tyd wat ons lewens beheers. Hy kan selfs die son laat stilstaan of laat terugbeweeg op sy vooraf bepaalde baan, as dit moet. Anders as ons wat dikwels nie weet wanneer om wat te doen nie, het elke ding in Yahweh se beplanning sy bepaalde tyd en sy bepaalde uur (Kohelet / Prediker 3). En dan, seker die belangrikste ding wat ek en jy as gelowiges moet weet en wat onomwonde in die Skrif geleer word: Ons tye is in sy hand – Tehielliem / Psalm 31:15 "My tye is in u hand; red my uit die hand van my vyande en van my vervolgers.
"Wat opvallend is in hierdie vers is dat ons tye in Yahweh se hand is, maar dat ons self dikwels in die vyand se hand is, en uit die vyand se hand gered moet word. Seker dié dat ons soveel moeite het om Yahweh se begrip van tyd aan te leer en ons eie lewe volgens daardie verstaan van tyd in te ruim. As die Psalmskrywer sê ons tye is in Yahweh se hand (Heb. "yad"), is die bedoeling ons tye is in sy MAG. Daar is dus nie 'n probleem met ons tye nie, want die ALMAGTIGE het beheer en volle seggenskap daaroor! Ons enigste probleem is dat ons self – ons eie denke en emosies – dikwels in die hand of in die mag van 'n vyand is. Ons laat toe dat ander mense en ander instansies en ander magte aan ons voorskryf hoe ons ons tyd hier op aarde moet uitleef! Die vyand waarvan Ps 31 praat is mense en gesindhede en besluite wat nie die heerskappy en die wysheid en die volmaakte tydsberekening van Yahweh vertrou nie en gedurig besig is om die tyd met geweld uit die hand van Yahweh te probeer ruk. So gebeur dit dat ons teen die wil van Yahweh indruis en 'n koers inslaan wat ons van sy seën en sy shalom vervreem.
In Hand 1:6-8 lees ons hierdie woorde: "Die wat bymekaargekom het, vra Hom toe en sê: Meester, gaan U in hierdie tyd die koninkryk vir Yiesraél weer oprig? En Hy antwoord hulle: Dit kom julle nie toe om die tye ("chronos") of geleenthede ("kairos") te weet wat die Vader deur sy eie mag bepaal het nie. maar julle sal krag ontvang wanneer die Afgesonderde Gees oor julle kom, en julle sal my getuies wees in Yerushalayiem sowel as in die hele Yehudah en Shomeron en tot aan die uiterste van die aarde." Aangesien ons nou in die ooreenstemmende tyd is as waarin die Messias hierdie woorde uitgespreek het (enkele dae voor Shavuot), sal dit goed wees om weer by hierdie woorde stil te staan en sommer ook in die res van Handelinge te gaan kyk na wat daar oor TYD geleer word.
Die Messias se antwoord hier is uiters betekenisvol. Terwyl ons mense dikwels die tyd en die tye wil uitpluis en uitlê en veral presies wil weet wanneer die groot gebeure van die eindtyd gaan plaasvind, wys die Messias vir ons waar ons eintlike prioriteite moet lê: Om deur die krag van die Afgesonderde Gees oral (van Yerushalayiem tot aan die uiterstes – Gr. "eschatos" – van die aarde) en altyd (tydig en ontydig – volgens Shaúl in 2 Tim 4:2) getuies van die Messias te wees. Snaaks genoeg, dit is dikwels omdat ons 'n probleem ontwikkel met TYD, dat ons nie uitkom by wat ons eintlike roeping hier op aarde moet wees nie. Kom ons kyk na enkele temas van tyd wat in die boek Handelinge aangeraak word.