Shemot (Eksodus) 19 beskryf die volk se aankoms by die berg Sinai en die voorskrifte wat nagekom moes word voordat hulle gereed was om die Torah te ontvang. Dis duidelik dat die gebeure van Shemot 19 op of baie naby aan die fees van Shavuot moes plaasgevind het. Vers 1 beskryf dit as die derde maand na hulle uittog uit Mietsrayiem (Egipte), d.w.s. nie drie maande later nie, maar terwyl hulle uittog in die eerste maand was (die 15 de dag van daardie maand), was die ontvangs van die Torah by Sinai in die derde maand. Ons kan nie uit die beskikbare gegewens aflei presies op watter dag van die maand dit was nie, maar Shavuot val altyd in die derde maand van die Skriftuurlike jaar. Die hoofstuk bereik sy klimaks by vers 24, waar Yahweh vir Mosheh sê: "Gaan heen, klim af. Dan moet jy, en Aharon saam met jou, opklim; maar die priesters en die volk mag nie deurbreek om na Yahweh toe op te klim nie, sodat Hy nie teen hulle losbreek nie." Hierdie vers bevat 5 verskillende werkwoorde wat saam ‘n duidelike, verreikende, maar ook ‘n radikale boodskap verteenwoordig: (1) Gaan ["halag"] (2) Gaan af ["yarad"] (3) Gaan op ["alah"] (4) Deurbreek ["haras"] 95) Losbreek ["parats"]. As ‘n mens die gebruik van hierdie vyf woorde in die res van Shemot, en ook die res van die Skrif nagaan, is daar ‘n patroon wat na vore kom wat vir ons ‘n beter begrip behoort te gee van die dieper betekenis van Shavuot.

1. GAAN ("halag"). Hierdie woord kom ook in Shemot 23:23 na vore (Want my Boodskapper sal voor jou uit gaan en jou bring na die Amoriete en Getiete en Periziete en Kenaániete, Gewiete en Yevusiete; en Ek sal hulle vernietig).

Boodskap: Yahweh stuur sy boodskapper voor sy volk uit.

Hand 2:18 En ook op my diensknegte en diensmaagde sal Ek in daardie dae van my Gees uitstort.

2. GAAN AF ("yarad"). Hierdie woord kom ook in Shemot 3:8 na vore (Daarom het Ek neergedaal om hulle uit die hand van die Mietsrayimiete te verlos).

Boodskap: Yahweh stuur sy kneg om af te gaan en sy volk te red.

Hand 2:22 die Natsarener, 'n man deur Elohiem vir julle aangewys met kragte en wonders en tekens wat Elohiem deur Hom onder julle gedoen het.

3. GAAN OP ("alah"). Hierdie woord kom ook in Shemot 24:2 na vore (En laat Mosheh alleen nader kom na Yahweh toe, maar hulle moet nie nader kom nie; en die volk mag nie saam met hom opklim nie).

Boodskap: Yahweh laat sy kneg alleen toe om op te gaan na Hom toe.

Hand 2:33 Nadat Hy dan deur die regterhand van Elohiem verhoog is … het Hy dit uitgestort, wat julle nou sien en hoor

4. BREEK AF ("haras"). Hierdie woord kom ook in Shemot 23:24 na vore (Jy mag jou voor hulle magtiges nie neerbuig en hulle nie dien nie, ook mag jy nie doen na hulle werke nie; maar jy moet hulle heeltemal afbreek en hulle klippilare kort en klein slaan).

Boodskap: Yahweh gee opdrag dat elke heidense gebruik afgebreek word.

Hand 2:40 En met baie ander woorde het hy hulle besweer en vermaan en gesê: Laat julle red uit hierdie verkeerde geslag

5. BREEK LOS ("parats"). Hierdie woord kom ook in Shemot 1:12 na vore (Maar hoe meer hulle verdruk is, hoe meer het hulle vermenigvuldig en hulle uitgebrei, sodat hulle bang geword het vir die kinders van Yiesraél).