Die tema en die simboliek van vuur kom gereeld in die Skrif voor en dien werklik om ons verstaan van sekere waarhede oneindig te verdiep. Boonop is daar sekere bekende voorvalle in die Skrif wat in 'n sekere sin letterlik met vuur omlyn is, sodat ons die krag en die grootsheid daarvan beter kan waardeer. 'n Mens dink hier aan die vuur en swawel wat Yahweh uit die Hemel op Sedom en Amorah (Sodom en Gomorra) laat neerreën het omdat die son de van die mense van die twee stede so groot was, dat die geroep daaroor tot by Yahweh gekom het. 'n Mens dink aan die deurdringende vraag wat Yietsgak vir sy vader Avraham gevra het - waarskynlik op dieselfde berg waar die Messias 1800 jaar later as offer vir die wêreld se sondes doodgemaak sou word: "Hier is die vuur en die hout, maar waar is die lam vir 'n brandoffer?" 'n Mens dink aan die doringbos wat in vuur gehul was, maar nie uitgebrand het nie, waar Yahweh sy gedenknaam aan Mosheh bekend gemaak het. 'n Mens dink aan Yahweh se voortdurende bewaring en beskerming oor die volk Yiesrael toe hulle deur die woestyn getrek het - bedags in 'n wolkkolom en snags in 'n vuurkolom. 'n Mens dink aan die berg Sinai waar Yahweh sy Torah vir die volk gegee, wat in vuur gehul was en soos 'n oond gebrand het en ontsaglik gebewe het en met donderslae en blitse omring was, omdat Yahweh in sy grootheid daar teenwoordig was.

'n Mens dink ook aan die bepaling in die Torah wat se dat as jy 'n vuur laat ontstaan en daardie vuur beskadig iemand se graan of sy veld of sy eiendom, dan moet jy ten volle daarvoor vergoed - en 'n mens wonder wat die implikasies sou wees as hierdie bepaling vandag nog konsekwent toegepas moes word. 'n Mens dink aan die seuns van Aharon wat vreemde vuur voor die aangesig van Yahweh gebring het - met ander woorde afgewyk van die voorgeskrewe manier van aanbidding - wat getref en verteer is met vuur wat van die aangesig van Yahweh uitgegaan het. 'n Mens dink aan die vuur uit die Hemel waarmee Yahweh onteenseglik sy grootheid in die tyd van EliYah bewys het en gemaak het dat die volk op hulle aangesigte neergeval het en ten aanhore van die Baälsprofete uitgeroep het: "Yahweh - Hy is Elohiem; Yahweh - Hy is Elohiem". 'n Mens dink aan die drie vriende van Daniel wat in 'n verterende vuuroond gegooi is (omdat hulle geweier het om vreemde magtiges te aanbid), maar wonderbaarlik aan die dood ontkom het. En so kan 'n mens aangaan. Vuur is onlosmaaklik deel van die boodskap van die Skrif in sy geheel en verbreed ons verstaan van wie Yahweh is en wat Hy van sy volgelinge verlang.

Maar wat is nou eintlik die betekenis van vuur? Is dit altyd net 'n aanduiding van oordeel? Is dit uitsluitlik 'n simbool om vrees en verskrikking by mense aan te wakker? Of is daar meer wat ons in die simboliek van vuur moet raaksien - waarhede wat ons andersins nie so maklik sou raaksien nie, wat spesifiek aan die simboliek van vuur gekoppel word? Die interessante is dat die Hebreeuse woord vir vuur ("esh") verband hou met die begrip fondament - wat moontlik beteken dat 'n beter verstaan van die konsep van vuur, kan help om die fondamente van ons geloof beter te verstaan. Kom ons ondersoek die Skrif van naderby om meer te wete te probeer kom oor die simboliese betekenis van vuur.

1. Vuur is simbolies van Yahweh se grootheid en afgesonderdheid - "Ek het bly kyk totdat trone reggesit is en 'n Oue van dae gaan sit het; sy kleed was wit soos sneeu en die hare van sy hoof soos skoon wol; sy troon was vuurvlamme, die wiele daarvan 'n brandende vuur" (Dan 7:9); "En die een het die ander toegeroep en gese: Afgesonder, afgesonder, afgesonder is Yahweh van die leërskare. Die hele aarde is van sy grootheid vol! En die drumpelposte het gebewe van die geluid van die roepers, en die huis het vol rook geword" (YeshaYahu 6:3-4).
2. Vuur is simbolies daarvan dat Yahweh jaloers is op die volle lojaliteit van hulle wat aan Hom behoort - "Want Yahweh jou Elohiem is 'n verterende vuur, 'n jaloerse El" (Devariem 4:24); "Hoe lank, Yahweh, sal U vir ewig toornig wees, sal u ywer brand soos 'n vuur?" (Tehielliem 79:5).
3. Vuur is simbolies van Yahweh se bewaring en beskerming van sy volgelinge - "En Elisha het gebid en gesê: Yahweh, open tog sy oë, dat hy kan sien. En Yahweh het die oë van sy dienaar geopen, dat hy kon sien, en meteens was die berg vol perde en waens van vuur rondom Elisha" (2 Melagiem 6:17); "En Ek sal vir hom wees, sê Yahweh, 'n vurige muur rondom en tot voortreflikheid daar binne-in" (ZegarYah 2:5).
4. Vuur is simbolies van die manier waarop Yahweh die gelowiges louter en suiwer - "Dan sal Ek die derde deel in die vuur bring en hulle smelt soos 'n mens silwer smelt en hulle toets soos 'n mens goud toets. Hulle sal my Naam aanroep, en Ek sal hulle verhoor. Ek se: Dit is my volk! En hulle sal se: Yahweh, my Elohiem" (ZegarYah 13:9); 'Want Hy sal wees soos die vuur van die smelter en soos die loog van die wassers. En Hy sal sit: 'n smelter en reiniger van silwer, en Hy sal die seuns van Lewi reinig en hulle louter soos goud en soos silwer" (Mal'agi 3:2-3).
5. Vuur is simbolies van die krag van die Woord en die waarheid van Yahweh – "Daarom, so se Yahweh, die Elohiem van die leërskare: Omdat julle hierdie woord praat, kyk, Ek maak my woorde in jou mond 'n vuur en hierdie volk hout, en dit sal hulle verteer" (YermeYahu 5:14); "En as ek se: Ek sal aan Hom nie dink nie en in sy Naam nie meer praat nie, dan word dit in my hart soos 'n brandende vuur, opgesluit in my beendere. En ek het my moeg gemaak om uit te hou, maar kon nie" (YermeYahu 20:9).
6. Vuur is simbolies van die swaarkry en vervolging wat volg vir hulle wat in die waarheid wan del en die sekerheid dat daar uitkoms sal wees – "U het mense oor ons hoof laat ry; ons het in die vuur en in die water gekom, maar U het ons uitgelei in die oorvloed" (Tehielliem 66:12); "As jy deur die water gaan, is Ek by jou; en deur die riviere - hulle sal jou nie oorstroom nie; as jy deur vuur gaan, sal jy jou nie skroei nie, en die vlam sal jou nie brand nie" (YeshaYahu 43:2).
7. Vuur is simbolies van die ywer waarmee mense wat Yahweh leer ken het, opstaan vir sy Woord en vir sy saak – "My ywer verteer my, omdat my teëstanders u woorde vergeet het" (Tehielliem 119:139); "En hulle se vir mekaar: Was ons hart nie brandende in ons toe Hy met ons op die pad gepraat en vir ons die Skrifte uitgelê het nie?" (Lukas 24:32).

In Mieshleh 30:15-16 lees ons hierdie woorde: Drie is dit wat nie versadig word nie; vier se nooit: Genoeg nie! -- die doderyk en die toegesluite moederskoot, die aarde wat nie genoeg water kry en die vuur wat nooit se: Genoeg nie! Kom ons neem hierdie eienskap van vuur as 'n element wat nooit genoeg kry nie (en steeds meer en meer wil verteer) as 'n kenteken van ons wandel met Yahweh - 'n kenteken wat ons hierdie gebed laat bid: Leer ons meer van u Woord, gee ons meer van u Gees, maak ons meer soos u Seun!