Ek het onlangs in ‘n artikel na ‘n klompie aanhalings uit die werke en sêgoed van die bekende CS Lewis gekyk. CS Lewis is in Ierland gebore, het in die eerste gedeelte van die vorige eeu gelewe het en veral bekendheid verwerf het met boeke soos "The Problem of Pain", "Surprized by Joy", "The Screwtape Letters" en "Mere Chistianity". ‘n Klompie jare gelede is daar ‘n film, "Shadowlands", oor sy lewe gemaak, waarin Anthony Hopkins die rol van CS Lewis vertolk het. CS Lewis het ‘n besondere skerp intellek gehad en oor die vermoë beskik om waarhede raak te sien en op só ‘n manier te beskryf dat mens met nuwe oë daarna kyk. Hier is net ‘n paar van die aanhalings van CS Lewis wat my aangegryp het:

CS Lewis het ook ‘n besondere fyn humorsin gehad en het graag die spot gedryf – nie met mense nie, maar met dinge en patrone wat tipies is van mense en die verhoudinge waarin hulle staan. So het hy by geleentheid, tong in die kies, gesê:

Die één tema waaroor CS Lewis seker die heel meeste nagedink en geskryf het, was oor die sin van die mens se bestaan en oor daardie dinge wat ‘n mens werklik vervul en bevredig en versadig. Hy was diep oortuig daarvan dat daar méér in die lewe opgesluit lê as dit wat ‘n mens met die blote oog kon sien en dit wat meeste mense hulle lewe lank najaag. In hierdie verband het hy eenmaal gesê:

En by ‘n ander geleentheid het hy bygevoeg: Aim at heaven and you will get earth thrown in. Aim at earth and you get neither.

By ‘n vorige geleentheid het ons uit die Skrif ontdek dat ‘n mens sterk kan wees op baie maniere – nie noodwendig net op die manier wat vir ons mense aanloklik en begeerlik is nie. Dieselfde geld ook van vervulling en versadiging. Van nature soek ons mense na vervulling en versadiging op die terrein van die vlees en op areas wat gesog en gewild in hierdie wêreld is. In hierdie verband speel BEGEERTE ‘n belangrike rol. Ons sien dinge in die wêreld rondom ons wat op die oog af bevrediging en versadiging bring en met die tyd word die BEGEERTE in ons al hoe sterker om hierdie dinge ook te kan ervaar. Saam met die begeerte is daar die VERWAGTING dat spesifiek hierdie dinge vervulling sal bring – niks meer en niks minder nie. Maar uiteindelik vind mens uit dat meeste van die dinge wat jy gehoop het vervulling sal bring, nie werklik bevredig nie. Dis soos ‘n honger wat nie versadig kan word nie. Daar bly altyd nog ‘n hongerkol in die maag oor. CS Lewis het dit êrens ráák beskryf: "You can't get a cup of tea big enough or a book long enough to satisfy me." So ook die skrywer van die boek Mieshleh (Spreuke): "Die doderyk en die plek van vertering word nie versadig nie; so word die oë van 'n mens (ook) nie versadig nie" (Mieshleh 27:20). Die Woord leer ons dat Yahweh ons op ander maniere wil versadig as dit wat ons in hierdie wêreld aantref. Maniere wat ook verrassend anders is as wat ek en jy van nature sou verwag. Die vraag is: Gaan ons aanhou om te probeer (en in die proses kosbare energie verspil) om vervulling te soek in dinge wat die wêreld as "spesiaal" en "opwindend" en "onoortreflik" gebrandmerk het, of gaan ons ons oë en ons harte daarvoor oopmaak dat Yahweh vir ons iets anders, en iets veel beters, in gedagte het, en begin om híérdie dinge met hart en siel na te jaag?

1. Vervul met die beeld van Yahweh in ons gedagtes en ons harte. Tehielliem 17:15 Maar ek sal u aangesig in geregtigheid aanskou; ek sal versadig word met u beeld as ek wakker word.
2. Vervul met die wete dat Yahweh in tye van ontbering ons rykdom is. Tehielliem 37:16-19 'n Klein bietjie is vir die regverdige beter as die rykdom van baie afvallige … Yahweh ondersteun die regverdiges … Yahweh ken die dae van die opregtes … Hulle sal nie beskaamd staan in die slegte tyd nie, en in dae van hongersnood sal hulle versadig word.
3. Vervul met die besef en die uitspreek van die goedertierenheid van Yahweh. Tehielliem 63:3 Want u goedertierenheid is beter as die lewe; my lippe moet U prys … So sal ek U prys my lewe lank, in u Naam my hande ophef … Soos met vet en vettigheid sal my siel versadig word, en my mond sal roem met jubelende lippe.
4. Vervul met die ontdekking dat Yahweh ons uitgekies het om in sy voorhowe te woon. Tehielliem 65:4 Geseënd is hy wat U uitkies en laat nader kom, dat hy kan woon in u voorhowe. Ons wil versadig word met die goeie van u huis …
5. Vervul by die aanskoue van die vrug van Yahweh se werke. Tehielliem 104:13 Hy laat die berge drink uit sy boonste kamers; die aarde word versadig uit die vrug van u werke.
6. Vervul met die verkwikking van die seëninge van Yahweh. YermeYahu 31:14 En Ek sal die siel van die priesters verkwik met vettigheid, en my volk sal versadig word met my seëninge, sê Yahweh
7. Vervul met die ervaring van die vergifnis van Yahweh. YermeYahu 50:19-20 En Ek sal Yiesraél na sy weiveld terugbring … en sy siel sal op die berge van Efrayiem en in Ghielád versadig word. In daardie dae en in daardie tyd, sê Yahweh, sal die ongeregtigheid van Yiesraél gesoek word, maar dit sal daar nie wees nie; en die sondes van Yehudah, maar hulle sal nie gevind word nie; want Ek sal vergifnis skenk aan diegene wat Ek laat oorbly.
8. Vervul met die lering tot geregtigheid, soos vroeë en laat reëns. Yahuél 2:23-26 Juig en wees bly in Yahweh julle Elohiem, want Hy gee julle die leraar tot geregtigheid en laat op julle neerdaal die reën, die vroeë reëns en die laat reëns, soos voorheen … Dan sal julle oorvloedig eet en versadig wees en die Naam van Yahweh julle Elohiem prys wat wonderbaar met julle gehandel het, en my volk sal in ewigheid nie beskaamd staan nie
9. Vervul deur jou te beywer vir die vervulling en die versadiging van ander. YeshaYahu 58:10-11 As jy jou siel laat uitgaan na die hongerige, en die neergeboë siel versadig; dan sal jou lig opgaan in die duisternis en jou donkerheid wees soos die middag. En Yahweh sal jou voortdurend lei en jou siel versadig in dor plekke en jou beendere sterk maak; en jy sal wees soos 'n tuin wat goed besproei is en soos 'n fontein van waters waarvan die water nooit teleurstel nie.
10. Vervul deur in alles daarop ingestel te wees om Yahweh te eer. Hoshea 4:10 Dan sal hulle eet, maar nie versadig word nie; hulle sal hoereer, maar nie uitbreek in 'n groot skare nie; want hulle het nagelaat om Yahweh te vereer.