In ‘n blog (internet gesprek) met die titel "Seënwense wat aanstoot gee" wat deur die Burger aangebied is, word die stelling dié week gemaak dat dit nie nodig is om aanstoot te neem wanneer iemand jou ‘n Geseënde Kersfees toewens nie, al het jy nie ‘n saak met Kersfees nie, of al is jy self ‘n Moslem of ‘n Hindoe. Om ‘n idee te kry van hoeveel verwarring daar in die harte van mense oor hierdie saak bestaan, het ek sommige van die bydraes op die blog hieronder aangehaal.

Met Kersfees herdenk Christene hul skepper se geboortedag

Het sopas n mail gekry van n dronk takbok wat n kersliedjie sing. Nie snaaks nie.

Wel ek dink 'n singende dronk takbok is snaaks

Ek kry die Kersboom jammer want kort-kort besluit iemand om kersbome uit openbare plekke te verwyder, omdat dit godsdienstig aanstootlik is

Moenie die kersboom jammer kry nie, kry die mense jammer wat onder die indruk verkeer dat die oprig van 'n boom wat met silwer en goud versier is ('n praktyk wat in Jeremia 10:2-5 as "die weg van die heidene" beskryf word) 'n manier is om erkenning te gee aan die geboorte van die Messias.

Kersfees beteken verskillende dinge vir verskillende mense.

As 'n nie -gelowige, voel ek nie geaffronteer as iemand vir my geseende Kersfees toewens nie (al het dit nie vir my 'n spesiale betekenis nie), en ek sal met groot vrymoedigheid vir 'n Christen dieselfde toewens

Laat die wat kersfees wil vier dit doen. ek self sal Newtonfees vier

Niemand sal my stil maak nie .... nie eers die regering nie … Johannes was onthoof ter wille van Jesus … nou ek staan ook in daardie ry … kersfees sal ek toewens al jaag hulle my ook weg, dan gaan ek net na ‘n ander plek.

`n Ortodokse Jood het op `n dag vertel hoe lief hy vir Jesus het! Iemand vra toe hoe dit moontlik is aangesien hy nie in Jesus as Verlosser glo nie? Hy antwoord:" As mense nie sy verjaarsdag gevier het nie sou dit nie so goed met my besigheid gegaan het nie. Nou koop hulle en Jesus bring groot besigheid!"

Ek kom gereeld deur die jaar Sondae saam met die gelowiges byeen. Kersoggend is vir my egter die een geleentheid wat dit vir my heerlik is om by die huis te bly en nie deel te wees van die vertrappery by die kerk nie. Dit laat ek maar aan die ouens oor wat nooit in `n kerk kom nie behalwe op Kersfees omdat dit tradisie is.

Ek tree sover moontlik hoflik op wanneer mense vir my 'n geseende Kersfees toewens omdat ek weet hulle bedoel goed, maar terselfdertyd ontstel dit my dat die mense nie weet hulle is met soveel heidense elemente besig en paradeer dit as Jesus se sogenaamde geboortedag nie.

Maar kom ons maak seker ons kinders besef – so teen die tyd dat hulle die Tandemuis en Kersvader natuurlik afsterf en besef Sneeuwitjie het toe nié uit die dood uit opgestaan nie – dat "God" en "Satan" en "Jesus" ook maar net storiekarakters is.

En dan hierdie een in Engels: I wanted to send some sort of holiday greeting to my friends, but it is so difficult in today's world to know exactly what to say without offending someone. So I met with my attorney yesterday, and on his advice I wish to say the following: Please accept with no obligation, implied or implicit, my best wishes for an environmentally conscious, socially responsible, low stress, non-addictive, gender neutral celebration of the solstice holiday, practised with the most enjoyable traditions of religious persuasion or secular practices of your choice with respect for the religious/secular persuasions and/or traditions of others, or their choice not to practice religious or secular traditions at all.

In reaksie op bogenoemde kan ‘n mens maar net sê soos wat Vincent van Sewende Laan hierdie week vir Vanessa gesê het: "We’ve created a monster!" Dis wat gebeur as mense tussenbeide tree en gebruike instel omdat hulle meen dat die Skepper se eie instellings en verordeninge nie aanvaarbaar of modern genoeg of kultureel, polities of godsdienstig korrek is nie. In plaas van ‘n verlustiging het Kersfees ‘n verleentheid geword. En die oplossing is nie om eenvoudig die opvallende heidense elemente soos kersbome en kersversierings en kersvaders en kersbokke weg te skraap en nog steeds voort te gaan om ewe vroom die geboorte van die Messias op dieselfde dag as die sogenaamde geboorte van die son te vier nie. So gaan ons nog steeds nie van die verwarring en die heidense bagasie rondom Kersfees ontslae raak nie. Kom ons kyk nog ‘n slag of daar nie in die Skrif meer spesifieke riglyne in hierdie verband na vore kom nie.