DIE VIER GROOTSTE MAGTE AAN ONS BEKEND

Algemeen gesproke is dit korrek om te beweer dat daar basies twee groot magte aan die werk is in hierdie wêreld: die mag van die Bose wat daarop uit is om te verderf en te vernietig en die almag van die Allerhoogste wat daarop gemik is om geregtigheid en vrede (shalom) in hierdie wêreld te vestig. Daar is baie ander magte en kragte wat ‘n rol speel in ons lewens, soos die magte wat na menslike vermoëns, emosies, begeertes en instellings teruggevoer kan word. Geeneen van hierdie magte kan egter op dieselfde vlak geplaas word as die mag van die Bose nie. En op sy beurt kan die mag van die Bose nie vergelyk word met die almag van die Allerhoogste nie. Die Skrif dui vir ons aan dat dit moontlik is dat ek en jy só deur die almag van die Allerhoogste beskerm kan word, dat die mag van die Bose ons nie blywende skade kan aandoen nie. Dit kan egter net gebeur as ons die Almagtige werklik liefhet en die keuse maak om by Hom te skuil.

Die merkwaardige is dat Yahweh, die Almagtige, oneindig baie doen om dit vir ons makliker te maak om hierdie keuse te maak. Hy sê nie net: Kies jy maar self of jy vir jou by My wil skaar nie. Nee, Hy openbaar Homself aan jou en my. Hy kom wys vir ons waarin sy almag geleë is. Natuurlik nie net sy almag nie – ook sy liefde en sy geregtigheid en sy getrouheid. Maar dit gaan vir ons hier veral oor sy almag. As ons kan uitvind presies waarin die groot mag van die Allerhoogste geleë is, in watter fasette dit veral na vore kom, sal dit dien as ‘n motivering om ons toevlug by Hom te neem. Ons behoort juis op hierdie spesifieke aspekte van sy almag te fokus wanneer ons met die ander groot magte in hierdie wêreld te make kry – veral die Bose en sy listige planne met ons.

Die Skrif sê onomwonde dat die hele wêreld in die mag van die Bose is (1 Joh 5:19) en dat wanneer iemand tot geloof kom, hy hom van die mag van Satan tot Yahweh bekeer (Hand 26:18). Satan se mag kom natuurlik op verskillende maniere te voorskyn. Een van die belangrikste gestaltes van die mag van Satan is die grootskaalse misleiding en dwaling in hierdie wêreld. Min mense besef hoe waar dit is dat die hele wêreld inderdaad in die mag van die Bose is. Dat duisendes wat meen dat hulle op die regte pad is, eintlik in die greep van misleiding is. Die Skrif is duidelik daaroor dat hierdie ‘n geweldige mag is waarmee ek en jy deeglik moet rekening hou. Openbaring 12 sê dat Satan die hele wêreld verlei. 2 Tessalonisense 2 sê dat Satan met allerhande kragtige dade tekens en wonders van die leuen kan bewerk. In Psalm 141 bid Dawid dat Yahweh hom sal bewaar van die vangnet van die een wat vir hom strikke stel. Die Skrif se getuienis is eenstemmig: Daar is een wat magtig is en wat strikke stel en daar is baie wat in hierdie strikke trap.

Waarop ons dus veral wil ingaan, is die vernaamste gestaltes van Yahweh se mag of krag, wat die mag van die Bose by verre oortref. Ons weet dat Yahweh almagtig is. Ons weet ook dat Hy aan Y'shua, sy Seun, alle mag in die hemel en op aarde gegee het (Matt 28:18). Y'shua het aan sy volgelinge mag gee om die krag van die vyand te neutraliseer, om selfs op slange en skerpioene te trap (Luk 10:19). Maar waarin is hierdie mag geleë? Hoe het die Almagtige by uitstek sy mag aan die mense van hierdie wêreld bekendgestel en op watter aspekte van sy mag behoort ek en jy te fokus sodat ons nie deur die magte van hierdie wêreld afgetrek word nie? Daar is veral vier aspekte van Yahweh se mag wat herhaaldelik in die Skrif ter sprake kom en waarvan ons deeglik behoort kennis te neem. Ons sou met reg kon sê: hierdie dinge is die vier grootste magte aan ons bekend.

  1. Die krag van Yahweh se Naam. Dit is opvallend hoe dikwels die mag en die krag van die Allerhoogste met sy Naam in verband gebring word. In Shemot 9:16 bring Mosheh die woord van Yahweh aan Farao: "Juis hierom het Ek jou nog laat bestaan, dat Ek jou my krag kan toon, en dat hulle my Naam op die hele aarde kan verkondig." Hierdie vers word weer aangehaal in Rom 9:17. In Tehilliem 54:1 hoor ons die versugting van Dawid: "O Elohiem, verlos my deur u Naam, en doen aan my reg deur u mag!" In Tehilliem 106:8 word daar teruggekyk na Yahweh se bemoeienis met Yisrael deur die geskiedenis: "Maar Hy het hulle verlos om sy Naam ontwil, om sy mag bekend te maak." In YermeYahu 10:16 kom die belydenis uit die mond van die profeet: "Geeneen is soos U nie, o Yahweh! U is groot, en u Naam is groot in krag" en in YermeYahu 16:21 verklaar die Almagtige self: "Daarom, kyk, Ek laat hulle hierdie keer voel, voel my hand en my mag; en hulle sal weet dat my Naam Yahweh is." Kan enige mens dit bekostig om hom te beroep op die almag van die Allerhoogste, sonder om erns te maak met sy Naam?

  2. Die krag van Yahweh se Regterhand. Wanneer daar in die Skrif van die magtige dade van die Allerhoogste gepraat word, word daar dikwels na sy regterhand verwys. Dit is tipies van die Hebreeuse denkwyse om ‘n abstrakte begrip soos krag en mag met ‘n tasbare, verstaanbare beeld, soos die regterhand, of die arm van Yahweh, te assosieer. Stel jou voor hoeveel krag daar opgesluit moet wees in die regterhand van dié Een wat volgens Tehilliem 8 die hemel en die aarde met sy vingers te voorskyn gebring het! In Shemot 15 maak Mosheh die Naam van Yahweh groot vir die bevryding uit Egipte: "O Yahweh, u regterhand is voortreflik gemaak deur krag. U regterhand, o Yahweh, verpletter die vyand." Een voorbeeld uit die Psalms, Tehilliem 20:6: "Yahweh sal sy Gesalfde verhoor uit sy afgesonderde hemel met magtige dade van verlossing van sy regterhand." YeshaYahu 41:10 is baie bekend: "Ek versterk jou, ook help Ek jou, ook ondersteun Ek jou met my reddende regterhand." ‘n Laaste voorbeeld uit die Nuwe Verbond – die Messias self het in Matt 26:64 gesê: "Van nou af sal u die Seun van die mens sien sit aan die regterhand van die krag van Yahweh en kom op die wolke van die hemel." Die Skrif gee konkrete gestalte aan die ongekende mag van die Vader: sy regterhand waarmee Hy magtige dade in die hemel en op aarde verrig.

  3. Die krag van Yahweh se Woord. Die hele Skrif is daarvan vol dat daar onmeetbare krag in die Woord van Yahweh is. Met elke skeppingsdag lees ons dat Yahweh ‘n woord gespreek het en dat elke skeppingswoord ‘n nuwe deel van die skepping tot stand gebring het. Dit word in Tehilliem 33:6 bevestig: "Deur die Woord van Yahweh is die hemele gemaak en deur die Gees van sy mond hulle hele leër." In die Nuwe Verbond word daar gereeld verwys na die krag van Yahweh se Woord. In Luk 4:36 hoor ons die verbasing oor die krag van die woorde van Y'shua: "Wat vir 'n woord is dit, dat Hy met gesag en mag die onreine geeste gebied, en hulle gaan uit!" In Hand 19:20 word gesê dat die woord van Yahweh met krag gegroei en sterk geword het. In Hand 20:32 spreek Sha’ul die ouderlinge van Efese toe en sê vir hulle: "En nou, broers, dra ek julle op aan Elohiem en aan die woord van sy guns, wat magtig is om julle op te bou en julle 'n erfdeel te gee onder al die afgesonderdes. Op dieselfde trant word die gelowiges in Jak 1:21 vermaan: "Ontvang met sagmoedigheid die ingeplante woord, wat in staat is om julle siele te red." Yahweh se Woord is voorwaar ‘n krag om mee rekening te hou!

  4. Die krag van Yahweh se Gees. Nog ‘n praktiese manier waarop die Skrif die onbeperkte krag van die Allerhoogste binne ons bereik kom plaas: deur vir ons die realiteit voor te hou van om met die Gees van Yahweh vervul te word. Die Voor-Messiaanse Geskrifte verwys gereeld na hierdie bron van krag. ‘n Mens dink aan Yegezkel 36:27 waar die Vader verklaar: "Ek sal my Gees in jul binneste gee en sal maak dat julle in my insettinge wandel en my verordeninge onderhou en doen." En kort daarna die visioen van die doodsbeendere in Yegezkel 37, die vraag aan die profeet of hy dink dat daardie beendere weer lewendig kan word en die bemoedigende woord in vers 14: "Ek sal my Gees in julle gee, dat julle lewendig kan word." Ook die bekende woord van ZegarYah 4:6: "Nie deur krag of deur geweld nie, maar deur my Gees, sê Yahweh van die leërskare." In die Nuwe Verbond, waar die belofte van die Ou Verbond op ‘n kragtige wyse in vervulling gaan, word daar selfs nog meer gemaak van die krag van Yahweh se Gees. Die beste voorbeeld is Hand 1:8: "Julle sal krag ontvang wanneer die Afgesonderde Gees oor julle kom, en julle sal my getuies wees …" En in aansluiting hierby Hand 10:37-38: "Julle weet van … Y'shua van Nátsaret, hoe Elohiem Hom gesalf het met die Afgesonderde Gees en met krag …". Yahweh is so groot in sy mag en sy voortreflikheid, dat Hy in die Skrif as "afgesonder" beskryf word. In ons beperkte terme kan ons maar net sê: Hy is in ‘n klas van sy eie – niemand kan op dieselfde vlak met Hom geplaas word nie. Daarom is Hy die "Afgesonderde". Maar om vir ons ‘n klein bietjie van sy groot mag te laat beleef, het Hy van sy Afgesonderde Gees in ons lewens ingeblaas! Met hierdie krag van die Almagtige binne-in ons kan ons nou regkry wat andersins nooit moontlik sou gewees het nie!