WAT VERBORGE IS EN WAT NIE …

DIE GEBRUIK VAN DIE WOORD "MUSTERION" (VERBORGENHEID) IN DIE NUWE VERBOND

1Kor 4:1 So moet ons dan beskou word as dienaars van die Messias en bedienaars van die verborgenhede van Elohiem.
  1. Die verborgenheid van die koninkryk wat deur die meerderheid (van hulle wat meen dat hulle reeds die koninkryk besit) verwerp sal word, omdat daar ‘n sluier oor hulle oë is, maar deur ‘n handjievol aanvaar sal word (omdat hulle bedag is op die invloed van die Bose, die misleiding in hierdie wêreld en die versoeking van wetteloosheid) en hierdie aanvaarding sal duidelik gesien word in die vrug wat hulle dra. Matt 13:3-43.
  2. Die verborgenheid dat Yahweh dit so beskik het dat die Messias aan ‘n folterpaal sou sterf en op ‘n manier wat in die oë van die wêreld veragtelik en vernederend is, aan ons die ware wysheid en geregtigheid en verlossing en afgesonderdheid van Yahweh sou openbaar. 1 Kor 2:7-8 en 1 Kor 1:21-30.
  3. Die verborgenheid dat gelowiges uit die heidendom mede-erfgename kan word van die gawes en die guns van Elohiem, mede-deelgenote aan die beloftes van die Woord en mede-lede van die liggaam van die Messias en mede-vertroosdes deur die hoop op die koninkryk wat voorlê. Efes 3:3-6 – sien ook Kol 1:24-27.
  4. Die verborgenheid dat wilde olyfboomtakke uit die heidennasies op die oorspronklike olyfboom van Yiesraél ingeënt word en dat die natuurlike Yiesraél se blindheid sal voortduur totdat die volle getal van die heidene ingekom het. Rom 11:24-26.
  5. Die verborgenheid dat nie almal sal sterf nie, maar sal lewe tot by die koms van die Messias en dan, saam met die wat opgewek word nadat hulle vroeër in die Messias gesterf het, nuwe onverganklike en onsterflike liggame sal ontvang en vir altyd saam met die Messias deel sal hê aan die verwagte koninkryk. 1 Kor 15:51 en 1 Tess 4:13.
  6. Die verborgenheid van die ontsettende toename in wetteloosheid wat die laaste dae sal kenmerk – meer as wat ooit tevore geken is – en van die openbaring van die "wettelose mens" wat homself bo alles en almal verhef mens en voorgee dat hy Elohiem is en deur sy groot mag baie verlei wat die waarheid nie liefhet nie. 2 Tess 2:7.
  7. Die verborgenheid van die eksklusiewe verhouding tussen Adam en Gawwah met al die gepaardgaande beginsels soos wedersydse respek, onderdanigheid, liefde en reinheid, wat profeties heenwys na die verhouding tussen die Laaste Adam en die gemeente. Efes 5:31-33.

1Ti 3:16 En, onteenseglik, groot is die verborgenheid van ware toewyding, (Hy) wat geopenbaar is in die vlees, geregverdig in die Gees, gesien deur boodskappers, verkondig onder die heidene, geglo in die wêreld, opgeneem in voortreflikheid.