WIE IS ONS TOG?

Oor die afgelope paar weke het die besef tot ons deurgedring dat dit dringend noodsaaklik geword het om ons voor Yahweh te verootmoedig en sy guns af te smeek oor onsself en die wêreld waarvan ons deel is. Daar is besluit om ‘n Dag van Verootmoediging uit te roep en Messiaanse gelowiges reg oor die hele land op te roep om hierby in te skakel. Ons het reeds by meer as een geleentheid die Skrif ondersoek en probeer vasstel watter soort gesindheid die Vader soek by mense wat hulle voor Hom verootmoedig. Dit gaan uiteraard oor méér as net nederigheid. Dit gaan ook oor ‘n diepe besef van Wie die Almagtige is, wat sy karakter is, hoe Hy voel oor dit wat tans in die wêreld gebeur en wat ons kan doen om weer nader te kan kom aan Hom en aan sy volmaakte wil vir ons lewens. In die Skrif is daar ‘n hele aantal voorbeelde van mense wat tot die besef gekom het dat daar tussen hulle en die Een wat in die hemel woon ‘n onmeetlike groot verskil is en, in die lig hiervan, byna in verwondering staan daaroor dat Yahweh nogtans met hulle bemoeienis maak. Kom ons kyk kortliks na sommige van hierdie gedeeltes en kyk wat ons by ons voorgangers in die geloof kan leer oor die gesindheid en die motief wat met verootmoediging behoort saam te gaan.

  1. Avraham se pleitbedes ter wille van enkeles wat getrou mag wees. Bereshiet (Genesis) 18:27-28 "En Avraham antwoord en sê: Kyk tog, ek het dit gewaag om met Yahweh te praat alhoewel ek stof en as is. Miskien sal daar aan die vyftig regverdiges vyf ontbreek; sal U ter wille van vyf die hele stad verwoes? En Hy antwoord: Ek sal dit nie verwoes as Ek daar vyf en veertig vind nie."
  2. Yaakov se beroep op Yahweh se beloftes. Bereshiet (Genesis) 32:9-12 "En Yaákov het gesê: o Elohiem van my vader Avraham en Elohiem van my vader Yietsgak, o Yahweh, wat my beveel het: Gaan terug na jou land en na jou familie, en Ek sal aan jou goed doen – ek is te gering vir al die gunste en al die trou wat U aan u kneg bewys het; want ek het met my staf oor hierdie Yarden getrek en nou twee kampe geword. Red my tog uit die hand van my broer, uit die hand van Esau, want ek is bang vir hom, dat hy sal kom en my doodmaak, die moeder saam met die kinders. U het tog self gesê: Ek sal beslis aan jou goed doen en jou nageslag maak soos die sand van die see wat vanweë die groot aantal nie getel kan word nie."
  3. Mosheh se ontdekking van die verborgenheid van die Vader se Naam. Shemot (Exodus) 3:11-13 "Maar Mosheh het vir Elohiem gesê: Wie is ek, dat ek na Farao sou gaan en dat ek die kinders van Yiesraél uit Mietsrayiem sou lei? En Hy antwoord: Ek sal met jou wees, en dit sal vir jou ‘n teken wees dat Ek jou gestuur het: As jy die volk uit Mietsrayiem gelei het, sal julle op hierdie berg Elohiem dien. Hierop het Mosheh tot Elohiem gespreek: Kyk, as ek by die kinders van Yiesraél kom en aan hulle sê: Die Elohiem van julle vaders het my na julle gestuur, en hulle my vra: Wat is sy naam? – wat moet ek hulle antwoord?"
  4. Dawied se inspirasie om Yahweh se lof te besing. 2 Shemuel (2 Samuel) 7:18-23 "Koning Dawied het toe ingegaan en voor die aangesig van Yahweh gebly en gesê: Wie is ek, Meester Yahweh, en wat is my huis, dat U my tot hiertoe gebring het … Ter wille van u woord en ooreenkomstig u hart het U hierdie hele groot saak gedoen, om dit aan u kneg bekend te maak. Daarom is U groot, Yahweh Elohiem! Want daar is niemand soos U, en daar is geen Elohiem behalwe U nie, ooreenkomstig alles wat ons met ons ore gehoor het. En wie is soos u volk, soos Yiesraél, ‘n enige nasie op die aarde, wat Elohiem vir Hom as ‘n volk gaan verlos het, en om vir Hom ‘n naam te maak; en om groot dinge te doen vir hulle en vreesaanjaende dinge aan u land voor u volk uit wat U verlos het vir U van Mietsrayiem, van die heidene en hulle magtiges?"
  5. Shelomo se keuse om liewer wysheid te bekom as rykdom. 1 Melagiem (1 Konings) 3:7-10 "Nou dan, Yahweh my Elohiem, U het u kneg koning gemaak in my vader Dawied se plek; maar ek is ‘n jong seun; ek weet nie om uit of in te gaan nie. En u kneg is midde onder u volk wat U verkies het, ‘n groot volk wat nie getel of bereken kan word weens die groot getal nie. Gee dus aan u kneg ‘n opmerksame hart om reg te spreek oor u volk, om tussen goed en kwaad te onderskei, want wie sou hierdie talryke volk van U kan regeer? En dit was goed in die oë van Yahweh dat Shelomo dit begeer het."
  6. Ezra se berou omdat die volk Yahweh se gebooie verlaat het. Ezra 9:5-15 "Maar op die tyd van die aandoffer het ek opgestaan uit my verootmoediging; en terwyl ek my kleed en my mantel skeur, het ek op my knieë my gebuig en my hande uitgebrei na Yahweh my Elohiem en gesê: My Elohiem, ek voel te beskaamd en verleë om my aangesig tot U, my Elohiem, op te hef, want ons ongeregtighede het oor ons hoof gegroei, en ons skuld is hemelhoog. Van die dae van ons vaders af tot vandag toe is ons in ‘n groot skuld, en oor ons ongeregtighede is ons self, ons konings, ons priesters oorgegee in die hand van die konings van die lande, aan die swaard, aan gevangenskap en aan plundering en beskaming van die aangesig soos dit vandag is … En wat sal ons nou na hierdie dinge sê, onse Elohiem? Want ons het u gebooie verlaat wat U deur u knegte, die profete, beveel het deur te sê: Die land waar julle inkom om dit in besit te neem, is ‘n onrein land vanweë die onreinheid van die volke van die lande … En na alles wat oor ons gekom het vanweë ons slegte dade en ons groot skuld … sal ons weer u gebooie verbreek en ons verswaer met hierdie gruwelike volke? Sal U nie op ons vertoorn wees, totdat ons vernietig is, sodat daar geen oorblyfsel of vrygeraakte meer is nie? Yahweh, Elohiem van Yiesraél, U is regverdig; want ons het as vrygeraaktes oorgebly soos dit vandag is. Hier is ons in ons skuld voor u aangesig, want niemand kan om sulke dinge voor u aangesig bestaan nie."
  7. YeshaYahu se voorbereiding om een van die kragtigste instrumente in Yahweh se hand te wees. YeshaYahu 6:1-8 "In die sterfjaar van koning UzziYah het ek Yahweh sien sit op ‘n hoë en verhewe troon, terwyl sy some die tempel gevul het. Serafs het bo Hom gestaan; elkeen het ses vlerke gehad: met twee het hy sy aangesig bedek, en met twee het hy sy voete bedek, en met twee het hy gevlieg. En die een het die ander toegeroep en gesê: Afgesonder, afgesonder, afgesonder is Yahweh van die leërskare. Die hele aarde is van sy grootheid vol! En die drumpelposte het gebewe van die geluid van die roepers, en die huis het vol rook geword. Toe het ek gesê: Wee my, ek is verlore! Want ek is ‘n man onrein van lippe en woon onder ‘n volk wat onrein van lippe is; want my oë het die Koning, Yahweh van die leërskare, gesien! Maar een van die serafs het na my toe gevlieg met ‘n gloeiende kool in sy hand, wat hy met ‘n tang van die altaar af geneem het, n my mond daarmee aangeraak en gesê: Kyk, dit het jou lippe aangeraak, en jou skuld is weg en jou sonde versoen. Daarna hoor ek die stem van Yahweh wat sê: Wie sal Ek stuur? En wie sal vir ons gaan? Toe antwoord ek: Hier is ek, stuur my."