Wanneer Yahweh in my pyn verskyn

Daar het ‘n paar jaar gelede ‘n boek van Coenie Nolte verskyn met die titel: "Wanneer God in my pyn verdwyn". Coenie het die boek geskryf na aanleiding van die traumatiese belewenis van ‘n dogter wat selfmoord gepleeg het en die wroeging wat hy as pa deurgemaak het om hierdie tragedie te verwerk. Ek het die boek nog nie self gelees nie, maar het ‘n artikel gelees wat die skrywer oor sy stryd en sy geloofskrisis geskryf het. In die artikel (en soos wat ek kan aflei, ook in die boek) kom ‘n mens diep onder die indruk van die geweldige en intense dilemma waarin hierdie gebeurtenis hom as ‘n gelowige gedompel het. ‘n Mens ontmoet hierin ‘n man wat opnuut begin het om die wortels en die integriteit van sy eie geloof – of soos hy dit noem: die geloofspakkie wat andere aan hom oorhandig het – te ondersoek en te weeg en te toets aan dit wat hy self beleef het. En dan erken hy ruiterlik: "Ek het ’n wilsbesluit geneem om van my God van gister, die almagtige Vader, die ‘God in die kassie’ waarmee ek groot geword het, afskeid te neem — hom dood te verklaar — en van voor af buite die kassie te begin soek na God".

Laat ons nie te haastig wees om Coenie te veroordeel nie. Hoe sou ons ooit kon weet wat hy alles in sy ure en jare van benoudheid deurgemaak het? Wie is ons om soos Job se sogenaamde vriende voor te gee dat ons al die antwoorde ken? Mens kan jou liewer daaroor verbly dat hierdie man in sy donkerste uur nie die deur na die Almagtige toegeklap het of met sy soektog opgehou het nie, maar dat hy dieper en dringender as ooit tevore begin soek het. En in die tussentyd, so glo ek werklik, by antwoorde uitgekom het wat weer sin en betekenis aan sy lewe gee.

Die titel van die boek impliseer dat wanneer ‘n mens pyn en lyding deurmaak, of swaarkry en stryd beleef, kan dit maklik gebeur dat jy Yahweh op die agtergrond skuif, of selfs heeltemal uit jou lewe uitskuif. Ons mense is nou maar eenmaal geneig om die Almagtige en sy betrokkenheid by ons, en sy liefde vir ons, te meet aan hoe goed dit met ons gaan. Daarom glo ons maklik as ons gesond is, en voorspoedig en suksesvol, maar sukkel ons in die geloof as dinge nie verloop soos ons gehoop het nie en die lewe sy tande vir ons wys. Dis net nie altyd so maklik om Yahweh se hand oor ons lewens raak te sien of te herken, wanneer ons deur periodes van sielewroeging en donker dieptes gaan nie. Tog is daar baie getuienisse in die Skrif wat bevestig dat Yahweh in mense se pyn en swaarkry, nie geheel en al verdwyn nie, maar soms bloot tydelik terugstaan, net om uiteindelik op ‘n baie spesiale en betekenisvolle manier weer te verskyn en sy grootheid aan daardie mense te openbaar – vir redes wat nie altyd aan hulle wat binne-in die krisis is, bekend is nie. Kom ons kyk opnuut na wat die Skrif vir ons in hierdie opsig leer.

  1. Die groter prentjie – Bereshiet (Genesis) 45:7-8 Maar Elohiem het my voor julle uit gestuur om vir julle 'n oorblyfsel op die aarde te verseker en om julle in die lewe te hou tot 'n groot verlossing. Julle het my dan nou nie hierheen gestuur nie, maar Elohiem; en Hy het my 'n raadsman van Farao gemaak en 'n gebieder oor sy hele huis en 'n regeerder in die hele Mietsrayiem.
  2. Bekendmaking van sy grootheid – Filippense 1:12-14 En ek wil hê dat julle moet weet, broers, dat wat ek beleef het, eerder op bevordering van die goeie nuus uitgeloop het, sodat my boeie openbaar geword het in die Messias onder die hele keiserlike lyfwag en by al die ander, en die meeste van die broers wat in die Meester deur my boeie vertroue gekry het, dit des te meer waag om die woord onbevrees te praat.
  3. Hy heers oor alles – 1 Kronieke 29:11-12 Aan U, Yahweh, kom toe die grootheid en die mag en die voortreflikheid en die roem en die majesteit, ja, alles in hemel en op aarde; aan U, Yahweh, kom toe die koningskap en die selfverhoging as Hoof oor alles. En die rykdom en die eer kom van U, en U heers oor alles; en in u hand is krag en mag, en in u hand is dit om alles groot en sterk te maak.
  4. Die misleiding van mooiweersprofete – YermeYahu (Jeremia) 27:9-10 Julle moet dan nie luister na julle profete en na julle waarsêers en na julle dromers en na julle goëlaars en na julle towenaars nie, wat met julle praat en sê: Julle sal die koning van Bavel nie dien nie. Want hulle profeteer leuens vir julle om julle ver te laat wees uit julle land, sodat Ek julle verdryf en julle omkom.
  5. Kwaad sowel as goed – Egah (Klaagliedere) 3:37-38 Wie praat daar, en dit gebeur? Het Yahweh dit nie beveel nie? Gaan uit die mond van die Allerhoogste nie kwaad sowel as goed nie?
  6. Hy gebruik dit vir sy doel – Handelinge 2:22-23 Yiesraéliete, luister na hierdie woorde! Y'shua, die Natsarener, 'n man deur Elohiem vir julle aangewys met kragte en wonders en tekens wat Elohiem deur Hom onder julle gedoen het, soos julle ook self weet - Hom, wat deur die bepaalde raad en voorkennis van Elohiem oorgelewer is, het julle deur die hande van wettelose manne geneem en aan 'n folterpaal opgehang en omgebring.
  7. Ondeurgrondelik en onnaspeurlik – Romeine 11:33-36 o Diepte van die rykdom en wysheid en kennis van Elohiem! Hoe ondeurgrondelik is sy oordele en onnaspeurlik sy weë! Want wie het die gedagte van Yahweh geken, of wie was sy raadsman gewees? Of wie het eers iets aan Hom gegee, dat dit hom vergeld moet word? Want uit Hom en deur Hom en tot Hom is alle dinge. Syne is die majesteit tot in ewigheid.
  8. Die rol van tyd – YeshaYahu (Jesaja) 9:1 Want nie langer sal dit donker wees daar waar benoudheid is nie: in die eerste tyd het Hy die land Zevulon en die land Naftali in veragting gebring, en in die laaste tyd bring Hy tot eer die weg na die see, die oorkant van die Yarden, die streek van die heidene. Tehielliem (Psalm) 126:5 Die wat met trane saai, sal met gejubel maai.
  9. Bestem vir verdrukkinge, maar nie vir toorn – 1 Tessalonisense 3:2-3 Ons het Timotheüs …gestuur om julle te versterk en julle te bemoedig in julle geloof, sodat niemand verontrus mag word onder hierdie verdrukkinge nie; want julle weet self dat ons hiervoor bestemd is. 1 Tessalonisense 5:9 Want Elohiem het ons nie bestem tot toorn nie, maar om die verlossing te ontvang deur ons Meester, Y'shua die Messias.
  10. Minder as wat ons verdien – Esra 9:13 En na alles wat oor ons gekom het vanweë ons slegte dade en ons groot skuld - want U, onse Elohiem, het ons minder toegereken as wat ons ongeregtighede verdien het. Tehielliem (Psalm) 103:10 Hy handel met ons nie na ons sondes en vergeld ons nie na ons ongeregtighede nie.
  11. Uitkoms in oorvloed – Tehielliem (Psalm) 66:10-12 Want U het ons getoets, o Elohiem, U het ons gelouter soos 'n mens silwer louter. U het ons in die net gebring, 'n swaar las op ons heupe gelê. U het mense oor ons hoof laat ry; ons het in die vuur en in die water gekom, maar U het ons uitgelei in die oorvloed. Devariem (Deuteronomium) 8:16 wat jou in die woestyn manna laat eet het …om jou te verootmoedig en jou te beproef, om uiteindelik aan jou goed te doen.
  12. Hy wag met ongeduld – YeshaYahu (Jesaja) 30:18 En daarom sal Yahweh met ongeduld daarop wag om julle guns te bewys, en daarom sal Hy Hom verhef om Hom oor julle te ontferm; want Yahweh is 'n Elohiem van die gerig. Geseënd almal wat op Hom wag!